Basic Electrical Workshop Seminar

Doha – Qatar, Nagsagawa ng 3days seminar tungkol sa Basic Electrical Wiring ang ilan sa mga kaibigan natin dito sa Qatar noong nakaraang bakasyon. Nais nilang ibahagi ang kanilang nalalaman sa ating mga kababayan na nais matuto sa nasabing workshop.

Binuo ang nasabing programa sa tulong ng ilan nating mga kababayan sa pangunguna ni Jaime Pamintuan na isang Senior Electrical Technician sa isang kumpanya dito sa Qatar. Marami ding tumulong upang mabuo ang nasabing programa na kinabibilangan nila Engr. Renato Bantayan, Engr. Nelson Reyes, at Engr. Cresendo Coquilla upang matuloy ang nasabing programa.

Marami ang nagkaroon ng interest tungkol sa Basic Electrical Wiring kaya marami din ang nagpatala sa unang araw ng nasabing programa upang makapag hand on sila at matuto kung paano ginagawa ang isang Electrical Wiring. Mula sa basic hanggang sa installation ay kanilang itinuro ang tamang paraan upang magamit nila ito at magkaroon ng munting kaalaman.

Ayon kay Ginoong Jaime Pamintuan nais niyang ibahagi ang kaniyang kaalaman upang maituro sa mga nagnanais matuto ng Basic Electrical Wiring sa ganitong paraan ay nakatulong na siya at nawala pa ang homesickness niya bilang isang OFW. Ang karunungan ng isang tao ay magiging mabiyaya kung ito ibabahagi sa iba nating kaibigan o kakilala at hindi ipagdadamot ng sa ganitong paraan ay nakatulong tayo sa ibang tao na nais matuto ng ibang kaalaman.

Bilang bahagi ng nasabing programa nais po natin iparating sa kapwa nating OFW na ang ganitong pamamaraan ay isang nakakabigay inspirasyon sa bawat Pilipinong nakikipag sapalaran sa ibang bayan.

Mula po sa gitnang silangan ang inyong lingkod BuhayOFW……

BuhayOFW - Finalist

Salamat po ng marami PEBA!

sa lahat ng bumubuo ng PEBA Team salamat po  ng marami sa kanilang pagpili sa BuhayOFW bilang isa sa mga Finalist sa PEBA 2011 Blog award. Ang kanilang napakagandang adhikain na makatulong sa kapwa tao sa pamamagitan ng ganitong pamamaraan ay isang kahanga-hangang gawa. Hindi ko pa rin lubos maisip na isa ako sa mga FINALIST para sa taong 2011 na ang tema ay "Ako'y magbabalik hatid ko'y Pagbabago" I will return, I will bring change. 

Lahat tayo ay naghahangad ng magandang buhay at isa sa mga paraan ay ang pag aabroad o pangingibang bayan. Sa totoo lang hindi ko akalain na makakarating ako sa ibang bansa gamit lang ang lakas ng loob at matibay na determinasyon sa buhay. May nagtiwala lang sa aking kakayahan kaya ako nakarating sa ibang bayan at maswerteng napili para subukan ang hamon na maging ahente. Gaya nga po ng sinabi ko sa aking lahok na  "Watawat sa Paliparan" Kung walang tiyaga, wala ding nilaga. Lagi natin iisipin na ang paghihirap natin sa ibang bansa ay may kapalit na ginhawa pagkatapos nito. 

Tayong lahat na OFW sa iba't ibang panig ng mundo. Kahit Saan man tayo lupalop mapadpad sa bayan natin, tayo ay babalik at sasariwain natin ang buhay bilang isang Pilipino. Kailan man hindi natin hinangad na malayo sa ating pamilya ng sobrang tagal dahil alam naman natin na sa Pilipinas ang ating tunay na tahanan.

Ang isa sa nagpalakas ng aking kalooban ay makitang masaya ang aking pamilya at maibigay sa kanila ang kanilang mga pangangailangan. Sa bawat padala na galing sa aking pagpupursige sa malayong lugar ay unti-unti kong nakikita ang pagbabago sa amin buhay. Ang patuloy na pagpapagawa sa aming tahanan ang aking inuuna upang kahit paano ay hindi na sila matuluan ng ulan sa loob ng bahay. Maraming hirap ang aking pinagdaraan subalit tiniis at nilaban ko iyon para sa aking pamilya. Ang magulong mundo ng BuhayOFW ang isa sa mga nagpatatag sa akin upang mabuhay kasama ang aking pamilya.

Walang kasing sarap ang mamuhay sa Pilipinas, Ang kasiyahan at ang kalayaan natin bilang isang Pilipino ay tanging sa Pilipinas lang natin nararanasan. Ika nga nila, "There's no place like Philippines". Isa iyan sa mga linya sa aking "Watawat sa Paliparan"

Ang Pinoy Expats/OFW Blog Awards (PEBA), INC ay isang non-profit and non stock na organisasyon na binubuo ng mga OFW at home base blogger na pawang volunteer lamang. Kahanga-hanga ang kanilang organisasyon bagamat walang pondo ay nagagawa nilang magpatimpalak ng katulad nito. salamat ng marami at naging bahagi ang BuhayOFW sa inyong patimpalak.

Malayo man ang marating ng bawat isa sa atin wag natin kalimutan ang tatak bilang isang Pilipino

Mabuhay po ang lahat ng Pilipino sa lahat ng panig ng mundo......

Ang inyong lingkod BuhayOFW

First Time Vacation - BuhayOFW

First time vacation.... Grabe nakaka excite pala kapag first time ka mag babakasyon after two years na nakikipag salaparan ka sa ibang bansa. Hindi mo mapigilan ang excitement dahil malapit mo ng makita ang mga mahal mo sa buhay at muli silang mayakap at mahalikan. Totoo pala na halos hindi kana makakatulog dahil parang gusto mo kinabukasan ay bitbit mo na ang maleta at bagahe mo para makauwi kana masilayan muli ang kanilang itsura. 

Sa dalawang taong kong mapapamalagi sa ibang bayan marami akong natutunan sa buhay. Maraming pagsubok ang dumating sa akin at marami din kaligayahan ang nangyari. Sa totoo lang hindi ko pa rin lubos maisip na nakatapos na ako ng dalawang taong kontrata sa kumpanyanng pinaglilingkuran ko dito sa disyerto ng Qatar ang bilis talaga ng panahon.

Nung unang tapak ko sa lupain ng Qatar para akong bata na tuwang tuwa picture dito picture doon ang ginawa ko kasi first time abroad. Maraming bagay ang hindi ko makakalimutan.  Una sa lahat ang pagtulong ng mga kasamahan ko sa trabaho noong nagsisimula pa lang ako sa abroad kanila "Sir Rolan, Brother Kiko, Boyet at si Condrad na nakauwi na nang Pilipinas. Sila ang mga taong unang tumulong sa akin noong ako'y nagsisimula pa lang mag abroad "Maraming salamat po sa inyong apat".

Ang pinapangarap kong bakasyon ay nagkatotoo na makasama ko sila sa buwan ng Disyembre at sa pagbubukas ng taong 2012. 

Ang aking panalangin:

Salamat po Ama sa mga biyayang ibinigay ninyo sa aming pamilya. Sa walang sawang pag iingat at pag tulong po ninyo sa amin noong kami ay nagkaroon ng problema.  Sa pagkakasakit namin na kami ay iyong pinagaling at higit sa lahat sa mga pagtapik po ninyo sa aming maling gawain.

Maraming salamat po

Ang lahat ng ito ay magalang naming hinihiling kay Jesus na aming tagapaglitas

Amen.....

Ang maibabahagi kong karanasan sa aking dalawang taong BuhayOFW ay ang mga sumusunod:

1. Ang Pag iipon - Lagi natin iisipin na ang buhay natin sa abroad ay hindi ganun kadali ang bawat pera na ating pinaghihirapan ay katumbas ng lungkot at hapis na hindi natin kapiling ang ating mga mahal sa buhay. Kaya ang pag iimpok ang pinaka mahalagang bagay na dapat nating gawin habang tayo ay nasa ibayong dagat. Sabi nga ng mga nakausap ko kailangan pag uwi ko ng Pinas may negosyo na akong maitatayo galing sa pinaghirapan ko dito. Totoong totoo po iyan dahil wala naman tayong ibang nais kundi ang makabalik ng Pilipinas at doon natin simulan ang ating magandang bukas kapiling ang ating mga mahal sa buhay.
2. Ang Pakikipag-kaibigan - Importante na gawin ng isang OFW ito dahil sila lamang ang magiging katuwang mo habang nakikipag sapalaran ka sa magulong mundo ng OFW. Ang kaibigan natin sa ibang bansa ang magiging dahilan para matanggal ang homesick at maging ang lungkot dahil sila lamang ang makakatulong para pansamantalang maibsan ang kalungkutan sila rin ang tutulong sayo kapag nagkaroon ka ng problema sa abroad.
3. Ang Pagtitipid - Ito ang hindi ko nagawa na kailangan kong baguhin sa aking pagbabalik abroad. Totoo pala na kapag first time abroad ka! ang ugali na hindi mo maiiwasan ay ang "Bilmoko - Bili dito Bili doon" ika nga nila one day millionaire. Kapag malapit ka na umuwi doon mo lang maiisip na bakit pa kasi ako bumili nito ang liit tuloy ng uwi kong pera. Tsk tsk tsk
4. Ang Pride - Kailangan may increase ako pag balik ko at kung hindi resign. Marami sa atin ang nag iisip nang ganito kapag malapit nang umuwi dahil nais nating madagdagan ang ating sweldo. Paano kung ang kumpanya na pinapasukan mo ay hindi ka kaya bigyan ng increase malamang makikipag bargain ka at kung hindi magkasundo ang hihingin mo Exit Clearance - Mag aapply ka ulit sa iba ng pahirapan at gagastos ka ulit ng malaking halaga para makapag aboad. Bago natin gawin ang isang bagay pag isipan po muna natin mahigit sa sampung beses bago tayo mag desisyon. Mahirap mawalan ng trabaho lalo na kapag may asawa't anak kana. Maiisip na lang natin iyan kapag nasa Pilipinas na tayo.
5. Ang Pag iingat - Ingatan natin ang ating uwing pera at maging ang ating dalang gamit minsan nakakaligtaan natin ito. May mga time na hindi natin maalala kung saan natin nailagay ang ating pera lagi natin iisipin na ang perang ating nakuha ay madali din mawawala dahil sa laki ng gastos sa Pilipinas ngayon. Tipid tipid ang kailangan para makaraos sa bakasyon sa Pilipinas.

Lahat tayo na mga BuhayOFW ay walang ibang nais kundi ang makapiling ang ating mga mahal sa buhay nais natin hilahin ang araw para madali natin silang makasama. Sa bawat bakasyon na ating gagawin ibigay natin ang ating oras para sa kanila dahil ang bawat segundo, minuto at oras na makapiling natin sila ay walang katumbas na kaligayahan ang ating madadarama.

Mula po sa BuhayOFW

Ang aking karanasan

Adobe Photoshop - BuhayOFW

Doha, Qatar - Ang karunungan o kaalaman sa isang bagay ay wag nating ipagdamot upang maging huwaran tayo ng ibang tao na walang ibang nais kundi ang makapag lingkod sa kanilang kapwa. Ganito ang nasa isip ko habang binubuo ko ang isang tutorials para sa "Adobe Photoshop" para sa aking mga kaibigan.

Bagaman hindi ako ganun kagaling sa pagtuturo at pag-gamit ng naturang software ay nagpapasalamat ako sa dakilang lumika na binigyan niya ako talino para maituro sa kanila ng maayos at kahit paano ay maibahagi ko ang aking kaalaman para makatulong sa kanila sa darating na panahon. 

Nakakatuwang isipin dahil sa loob ng mahigit sa apat na linggo naming pag aaral nakita ko sa kanila ang interest para matuto at mag-aral ng software na "Adobe Photoshop". Ang kanilang interest ang nagbigay sa akin ng lakas ng loob para matuloy ang iniisip kong plano para sa kanila.

Sa bawat panahon na kami ay nag aaral hindi ko lubos maisip kung paano ko nagagawa ang ganung bagay dahil wala naman akong background sa pagtuturo at humarap sa kanila bilang isang professor. Sabi nga ng isa sa mga estudyante na aking tinuturuan "Sir buti na lang nagturo ka ng ganito dahil malaking bagay ito para kami ay matuto ng ganitong kaalaman". Isang nakakatuwang linya na aking sineryoso para gumawa ng plano kung paano ko sila matuturuan ng maayos at maibahagi sa kanila.

Sa mahigit na 20 estudyante na aking tinuruan marahil makakagawa na sila ng ilan sa mga "Artworks" na gusto nila magawa dahil naituro ko na sa kanila kung paano gamitin ang bawat tools ng photoshop. 

Hangad ko na sa mga darating na panahon ay magawa nila ang aking mga itinuro at maibahagi rin nila sa kanilang mga mahal sa buhay, maging sa kanilang mga kaibigan para magamit sa bawat araw na lumilipas.

Sa lahat ng aking mga estudyante tungkol sa "Adobe Photoshop Tutorials" maraming salamat po sa inyong pagtitiwala. Kahit papaano meron po kayo natutunan kahit na konti at palawakin na lang po ninyo ang inyong mga likha para magamit po ninyo sa ikakabuti ng lahat.

Ang inyong lingkod BuhayOFW

New7Wonder of Nature - Puerto Princesa Underground River

Isang magandang balita para po sa ating bansang Pilipinas. Ang ating Puerto Princesa Underground River ay isa  sa napiling New Seven Wonder of Nature. Kahit ito po ay provisional winner pa lang isa na ito sa tagumpay ng ating PPUR dahil alam natin na ang PPUR ay isa sa maiituturing na ingat yaman ng ating bansa.

Tagumpay ng Puerto Princesa Underground River tagumpay ng bansang Pilipinas.

Lahat po ay nagtulong tulong para sa isang adhikain at layunin na patunayan na ang bansang Pilipinas ay isa sa mga lugar na may magandang tanawin. Kami sa hanay na mga OFW sa bansang Qatar ay nagkaisa upang kahit paano ay makatulong sa paraan na makaboto ang ating mga kababayan sa pamamagitan ng mangungulit sa kanila.

Maraming salamat po sa mga bumubuo ng PPUR Organising Commitee ng bansang Qatar mula sa aming embahada ng Pilipinas Ginoong Cresente Relacion at ng grupong BalitangQ. Sa lahat ng taong nakasama upang maging matagumpay ang pagboto maging ang social media group at iba't ibang organisayon sa bansang Qatar panalo po ang ginawa nang bawat isa sa atin.

Salamat sa inyong suporta.....

Mula po sa BuhayOFW nag uulat - BalitangQ member

BuhayOFW - Araw ng Undas

Doha, Qatar - Araw ng Undas (November 1-2, 2011) Isang pag alala sa ating mga mahal sa buhay. Ito rin ang araw na kapanganakan ng aking INA. Karamihan sa atin ay nagpupunta sa mga libingan at sementeryo para dalawin ang ating mga namayapang mahal sa buhay. Karamihan sa atin ay nagtitirik ng kandila at nagdadala ng kung anu-ano sa lugar kung saan nakahimlay ang ating mga minamahal.

Ngunit paano kung nasa abroad ang isa sa atin. Paano natin magagawang dalawin ang puntod na libingan ng ating mga namayapang kapamilya, kamag-anak at maging ang ating kaibigan. 

Hindi ko makakalimutan ang aking Ama at Ina na nagtaguyod sa aming magkakapatid upang mabuhay dito sa mundo. Kaya naman kahit hindi ako katoliko na katulad ng aking mga kaibigan ay nagbibigay pa rin ako ng respeto sa aking mga magulang sa pamamagitan ng pag-alala sa kanila. Isang munting panalangin ang aking inaalay sa tuwing sasapit ang araw na ito bagama't alam ko na hindi na nila alam ang aking ginagawa ay patuloy ko pa rin silang inaalala.

Mahirap mawalan ng magulang sa maagang panahon hindi na nila naabutan na nagkaroon ako ng mga anak dahil maaga sila namayapa. Nakakalungkot  talaga isipin dahil wala akong nagawa. Alam naman nila ang aking nagawa para sa kanila noong nabubuhay pa sila at ganun naman talaga ang buhay hindi natin alam kung hanggang kailan tayo dito sa ibabaw ng mundo. Alam ko naman na masaya sila kung asan man sila ngayon dahil natupad ko ang pangako ko na makakapunta ako ng abroad balang araw at maipakita sa kanila ang aking pagpupursige para sa kanilang mga apo na hindi na nila naabutan pa. 

Naalala ko pa noong nabubuhay pa ang aking AMA sinabi niya sa akin na gusto niyang makita ang aking anak na lalaki na kasing gwapo ko nakakatawa diba! Sa tuwing naalala ko nga ito may kurot sa aking puso dahil hindi ko makalimutan ang katagang iyon. Hinding hindi ko rin makakalimutan ang araw na sila ay pumanaw at iyan lagi ang pumapasok sa isip ko kapag sumasapit ang araw na ito. Nakakapang hinayang talaga kung nagawa ko ng maaga na maka pag abroad ako marahl ay nadala ko pa sila sa pagamutan at humaba pa ang kanilang buhay.

Maraming bagay na iniwan sa akin ang aking mga magulang katulad na lang ng suot kong porselas na gawa sa stainless na mula sa aking INA gamit gamit ko pa ito hanggang sa ngayon. Sa katunayan kahit masikip na sa aking kamay ay pilit ko pa rin itong sinusuot dahil ito lang ang bagay na nakakapag paalala sa aking INA. Maging ang sout kong relo na Quartz(Q&Q) ito ang nagsisilbing oras ko dahil ito ang gamit ng aking AMA noong nabubuhay pa siya.

Ang mga bagay na iniwan sa akin ng aking mga magulang ay walang katubas na presyo o kayamanan bagaman ito ay hindi gaano karangya sa mata ng tao ito ang pinaka importanteng bagay na iniwan sa akin ng aking mga magulang. 

Napaka swerte ko pa rin bagama't walang iniwan sa akin na kayamanan gaya ng bahay, ari arian, at maging pangkabuhayan hindi ako nagsisi sa iniwang mahalagang bagay sa akin. Ito ang masasabi kong kayamanan na hindi ko ipagpapalit kanino man.

Ang pag alala sa ating mga magulang at maging sa ating mahal sa buhay ay wag po nating kalilimutan bagaman sila ay pumanaw na nakatatak pa rin sa ating mga puso at isipan ang kanilang pagmamahal at pagkalinga. 

Mula po sa BuhayOFW

Bagong Bayani ng BuhayOFW

Doha, Qatar - Hindi ko pa man din natatapos ang aking pagsusulat tungkol sa pinagpipilian kong bagong bayani para sa BuhayOFW. Lumitaw agad ang pangalan ni Tito Frank Jamandre na siyang pangulo ng Philippine Nurses Association Qatar(FNAQ) na isa sa hinirang na bagong bayani para sa taong 2011.

Ang kanyang pamumuno sa kanilang organisasyon (Filipino Mission Doctors/Dentists/Pharmacists/Nurses & Volunteer in Qatar) ang isa sa naging kasangkapan para hiranging siyang bagong bayani ng ating henerasyon. Isa ito sa maiituturing kong napakalaking karangalan na nakilala at nakasama ko minsan sa mga proyekto para sa mga OFW.

Pinuno ng organisyon sa Qatar kasama si Ambasador Relacion

Marami sa amin ang humahanga sa kanyang liderato maging ang mga pinuno ng mga organisasyon dito sa Qatar ay saludo sa kanyang pagmamalasakit sa ating mga kababayan na hindi kayang magpagamot dala ng maliit na sahod. Siya rin ang isa sa mga naging kasangkapan para maging matagumpay ang 113th Independence Day dito sa Qatar. Kahahanga hanga ang kanyang pinamalas dahil pinakita niya sa lahat na magagawa natin ang pagtulong sa mga kababayan ng hindi naghahangad ng anu mang kapalit. 

Tito Frank in Action

Ilang beses ko nang sinundan ang mga misyon ng kanilang grupo. Sa bawat pagpunta ko doon hindi ko malilimutan na hanapin si Tito Frank dahil gusto kong subaybayan ang kanyang misyon para sa mga OFW nating kababayan. Nakita ko ang ngiti ng ating mga kababayan kapag natatapos na silang magpakonsulta ng libre. Maging ang ibang nasyonalidad ay humahanga sa kanilang grupo sapagkat hindi nila ipinagkait ang tulong pang medical. May nakausap akong isang Indian National habang kausap ko siya nasabi niya sa akin na kakaiba daw ang ugali ng mga pinoy dahil nakita niya na bagama't hindi magkakakilala ng lubusan ay nagtutulungan at mapagmahal sa kapwa. Nakakatuwa di po ba dahil sa kanila mismo nang galing ang salita na matulungin at mapagmahal sa kapwa tayong mga Pilipino.

Tito Frank at ilan sa mga kaibigan

Kaya naman sa iyo Tito Frank Jamandre saludo po ang BuhayOFW at maging ang mga kababayan natin dito sa Qatar ay talagang humahanga sa iyong misyon ipagpatuloy po ninyo ang inyong nasimulan at ipakita natin sa buong mundo na ang Pilipino ay matulungin at mapagmahal sa kapwa tao.

Tito Frank at BuhayOFW

Salamat po sa inyong misyon......

Ang BuhayOFW

Ang Kasambahay sa ibang bayan

Isang magandang araw po BuhayOFW, Iyan ang bungad sa akin ng isang kasambahay na nakilala ko dito sa abroad ng minsan pumunta ako bahay ng isa kong kliyente dito sa abroad. Isa siyang kasambahay na ang amo ay prominenteng tao dito sa abroad. 

Kinamusta ko ang kanyang kagalayan bilang kasambahay. Sabi niya sa akin, Maayos naman ang kanyang kalagayan dito dahil maganda ang magpamalakad ng kanyang amo. Tuwang tuwa niyang kinukwento sa akin na nakarating na siya sa mahigit na 10 iba't ibang bansa. Kahit na mababa ang sweldong kinikita niya ay suportado siya ng kanyang amo. Malaya siyang nakakagamit ng mga kagamitan gaya ng cellphone, computer at iba pang gamit sa bahay. Nakakatuwang isipin na bihira sa mga kasambahay ang binibigyan ng pagkakataon na kanilang amo ng ganitong prebeleheyo.

Isa pang kwento niya sa akin kapag may nakalumaan nang gamit ang kanyang amo ay ibinibigay na lang sa kanya ito at nagagamit niya ng maayos. Nakakatuwa diba dahil napakabait ng kanyang amo at sana ganito rin ang nararanasan ng iba nating mga kababayan na kasambahay.

Bago pa ako umalis sa bahay ng kanilang amo na aking kliyente at binigyan pa ako ng maiinom at sandwich na gawa nila kaya naman nakakatuwang isipin na sabik ang ating mga kababayan na makasalamuha ng kapwa pinoy. Sobrang saya ang nararamdaman nila ng makilala nila ang katulad kong ordinaryong tao na sumusulat ng ganitong istorya ng mga OFW. Isang pasasalamat po ang aking ipapaabot sa inyo na minsan ko po kayo nakilala dito sa ibang bayan na ating pinuntahan.

Ang kasambahay ang isa sa maraming trabaho sa labas ng bansa at ito rin ang isa sa marangal na trabaho na pinagmamalaki ng ating mga kababayan. Ipinamamalaki kong sabihin sa inyo na bagamat marami sa ating mga kababayan ang dumadanas ng kalupitan sa kanilang amo ay taas noo pa rin nila ipinagmamalaki ang kanilang trabaho. Hindi ko makalimutan ang sinabi sa akin ng kasambahay na nakilala ko "Sir ang trabaho namin dito ay katulong lang pero ikinararangal namin ito dahil marangal ito,  Ito lang kasi ang aming naabot dahil hindi naman kami nakatapos ng pag aaral. Masaya kami dito dahil nakakatulong kami sa aming pamilya para may ipadala sa kanila. Hindi kami nagnanakaw at gumagawa ng mali dahil alam namin na kami rin ang maapektuhan nito". Sa kanyang sinabi ay umantig sa aking puso ang pagiging mababang loob ng kababayang ito. Nakita ko ang kanyang pagmamahal sa kanyang sarili at maging sa kanyang pamilya.

Sa mga kababayan natin nagkaroon ng pagkakataon na makasalamuha ng katulad nilang kasambahay. Patuloy po sana natin sila suportahan at bigyan ng pansin dahil sa hindi biro ang kanilang pinagdaanan bilang kasambahay dito sa ibang bayan. Ang marangal na trabaho ay susi sa ikatatagumpay ng bawat Pilipinong nakipagsapalaran sa ibang bayan.

Maraming salamat sa pagkakataon na nakakilala ko ang isang kasambahay na maayos ang kalagayan sa kanilang amo. Patuloy ko pong ipagdarasal ang inyong magandang kalagayan sa piling ng bawat amo na inyong pinaglilikuran.

Ang inyong lingkod BuhayOFW

Janela Lelis - Estudyante ng Malinao Albay

Nakatawag sa aking pansin ang kabayanihan ng batang ito na kanyang iligtas ang bandila ng ating bansang Pilipinas sa paghagupit ng bagyong Juaning. Nakakabilib dahil sa kanyang murang edad nasa isip din niya ang ganitong kabayahinan.


Isang kahanga-hanga ang kanyang pinakita ang pagmamahal sa ating bandila. Kaya naman ang BuhayOFW ay sumasaludo sayo at sana marami pa ang gumawa ng ganyang pagpapahalaga sa ating Bandila.

For the latest Philippine news stories and videos, visit GMANews.TV

Sa ating mga OFW nakita ko rin ito ng minsang magkaroon kami ng isang pag uusap-usap sa Dugong PINOY-UFV dito sa Qatar. Kung ano ba talaga ang tamang posisyon at kulay ng ating watawat ng pilipinas. Nalaman ko rin na bihira sa atin ang makapuna sa tamang posisyon ng ating bandila kapag ito ay nakapahalang ang posisyon at dito ko lang din napansin na marami pala sa ating mga kababayan ang nagpapahalaga kung gaano kahalaga sa kanila ang posisyon ng ating bandila.


Marami sa atin ang hindi natin nakakapansin sa tamang posisyon ng ating watawat dahil halos lahat naman sa atin kapag nakita na ang watawat ng Pilipinas na may asul, pula, dilaw, puti, araw at bituin ay iyan na ang bandila ng Pilipinas. Ang bawat disenyo na ginagawa ng mga kababayan natin na gumawa ng logo ng ating bandila ay dapat naaayon sa ating bandila dahil isa iyan sa ating trademark ng ating bandila.

Sa aking paglalakbay at pakikipag salamuha dito sa aking bansang aking pinuntahan ay tinama rin ang ilang lugar na may bandila ang Pilipinas katulad na lang sa ginawa ng aming kaibigan si Ma. Leonora Ilas na itinama niya ang bandila ng Pilipinas at personal pa niyang pinuntahan ito. Ang pag mamalaskit niya bilang isang ordinaryong tao ay kabayanihan na aking hinahangaan. Ang lahat ng mga taong nag asikaso ng pagtatama ng posisyon ng ating bandila sa iba't ibang panig na mundo ay atin pong pagtulungan dahil isa ito sa mga dapat naging maging ugali dahil tayo'y mga Pilipino. 

Ito ang ilan sa tamang posisyon ng ating Watawat ng Pilipinas

Puerto Princesa Underground River

Ang Puerto Princesa Underground River ay isa sa mga kalahok sa ginaganap na Seven Wonder's of the World. Ang buong Pilipinas maging ang lahat ng mga kababayan nating OFW sa iba't ibang panig ng mundo ay sumusuporta sa ating Kalikasan. Kaya naman buong pagmamalaki po nating sabihin sa ating mga kakilalang dayuhan ang ating pinag yayabang na Underground River na matatagpuan sa Palawan Philippines.

Kami na mula pa sa bansang Qatar ay nagkakaisa upang maipanalo ang ating pinagyayabang na underground River at iyan po ay suportado ng aming mahal na ambasador Crescente Relacion at lahat ng bumubuo ng embahada ng Pilipinas sa bansang Qatar.

Mula po sa ng bumubuo ng BalitangQ, CCA, Dugong Pinoy-UFV, FDOQ, PPUR Commitee, FilCom, at iba't ibang grupo mula sa Qatar ay sumusuporta upang maipanalo ang ating iniingatang Underground River.

Ilan sa paraan para bumoto:

Website: www.new7wonders.com

Pumili ng 7 kalahok kasama ang ating Puerto Princesa Underground River

Hintayin na confirm ang iyong boto. Forward na rin natin sa ating mga kaibigan, kamag-anak at kakilala.

Text Message: Alamin po ninyo ang cellphone provider na ginagamit ng bansang inyong nasasakupan at ubusin po ninyo ang inyong load. Para makadagdag boto sa ating PPUR

Telepono: www.new7wonders.com/vote-by-phone

1. Dial one of these international telephone numbers:
   +23 92201055
   +1 869 760 5990
   +1 649 339 8080
   +44 758 900 1290
2. At the end of the message, after the tone, insert the 4 digit code for your chosen nomine
3. When you hear the thank you message, you are all done – you have voted by telephone.
4. Ang ating PPUR ay 7723

Ramadan Kareem

Ang mga kaibigan nating muslim ay ipinagdidiwang ngayon ang simula ng Ramadan. Ang Ramadan ang isa sa pinaka importanteng araw para sa kanila kaya dapat nating respetuhin kung anu man ang kanilang mga batas lalo na sa mga lugar kung saan maraming tayong kapatid na muslim. Ang panahon na ito ay pag alala nila sa mga mahahalagang pangyayari sa relihiyong islam. Marami sa ating mga kababayan muslim ay itinutuon ang kanilang sarili sa pagdarasal.

Mula po sa mga nasaliksik kong kaalaman ay ibibigay ko po sa inyo kung anu-ano ang dapat gawin ng mga kababayan nating nasa bansang marami ang kapatid nating muslim.

Mga bagay na ginagawa ng mga kababayan nating Muslim.

1. Fasting - Alam naman natin na ito ang isa sa mga ginagawa ng mga kapatid nating muslim kapag araw ng ramadan. Dito kasi nila naipapakita ang kanilang disiplina sa sarili, sakripisyo at ang paggalang sa kautusan ng dakilang lumikha. 
2. Prayers - Marami sa mga kababayan nating muslim kapag panahon ng Ramadan ay inuukol nila ang kanilang sarili sa pagdarasal at pag aayuno.
3. Charity - Ang karamihan sa mga kaibigan natin mga muslim ay nag uukol ng panahon sa pagbibigay ng charity sa mga institution na kailangan ng tulong. Masaya sila kapag nagbibigay ng tulong dahil isa ito sa kautusan ng mga Muslim kapag araw ng Ramadan.
4. Respect - Ang panahon na ito ay puno ng respeto sa bawat isa lalo na sa mga kapatid nating muslim. 

Mga bagay na dapat nating gawin sa panahon ng Ramadan.

1. Sumunod sa kanilang panuntunan bilang respeto sa mga kaibigan nating muslim.
2. Wag kumain o uminom sa mga pampublikong lugar lalo na kapag oras ng Ramadan.
3. Wag manigarilyo o ngumuya ng tsiklet dahil ang ganitong gawain ay paglabag sa kautusan nila.
4. Mag ingat po sa pag mamaneho dahil karamihan sa mga kaibigan nating muslim ay fasting kaya medyo nahihilo po sila sa pag mamaneho.
5. Wag mag ingay sa mga pampublikong lugar at magpatunog ng malakas sa mga malapit na mosque para hindi magambala ang kanilang pag darasal.
6. Ang pananamit sa pambulikong lugar ay atin pong isa ayos wag po tayong mag suot ng mga maiikling damit na makikita ang ilang parte ng ating katawan.

Ang panahon ng Ramadan ay napakahalaga sa ating mga kababayang Muslim kaya ang panahon na ito ay ating igalang bilang pag respeto sa kanilang relihiyong ISLAM. Alam naman natin na isa ang Islam sa pinaka maraming aktibong relihiyon sa buong mundo. Ang kanilang bahagi sa kasaysayan ay nakatatak na ating mga isipan.

Mangyari po lamang na sumulat sa angbuhayofw@gmail.com kung mayroon po kayong nais iparating sa sulating BuhayOFW.

Maraming salamat po

BuhayOFW Anibersaryo

July 26, 2011 - Sa pagsapit ng ating anibersaryo para sa sulating BuhayOFW dito sa ibang bansa na sinundan at tinangkilik ng mahigit sa 17,000 katao upang alamin kung paano ba talaga ang buhay ng mga OFW sa ibang bansa. Marami ang nagbigay ng kanilang mensahe upang suportahan at tangkilikin ang ating sulatin BuhayOFW.

Karamihan sa mga taong nakakasalamuha ng inyong lingkod ay pawang maliit at baguhang OFW. Nakilala at nakausap kung paano ba mamuhay ang isang baguhang OFW. Alam naman natin na napakahirap ang maging isang OFW at iyan ang pilit inaalam ng inyong lingkod. Sa aking paglalakbay at pakikipag kaibigan sa ibang bansa marami akong natutunan kung paano ba nakatatagal at makipag salamuha sa ibang tao. Maraming hindi makakalimutang sandali ang dumaan sa akin, mga pagsubok at homesick na palaging andiyan sa tuwing naaalala natin ang ating mga mahal sa buhay. Ilan lang yan sa mga pagsubok na dinadanas ng isang OFW.

Sa pagsapit ng ika isang taong anibersaryo sa darating na Hulyo 26, 2011 ng sulating BuhayOFW Maraming nakakatuwang pangyayari ang naganap sapagkat nakarating ito sa mahigit sa 74 bansa na hindi ko lubos akalain na magagawa ko pala na maipahayag sa ibang tao ang aking karansan. Ang mga sulating nagawa ng inyong lingkod sa pamamagitan ng blogging ay tinangkilik at minahal ng publiko. Maraming papuri at sintemento ang natanggap lalo na sa mga taong totoong nararanasan nila ang hirap na maging isang OFW. Naisama sa GMA7 Pinoy Abroad website ng 3 beses at ngayon ay nasa sulating Focus in the Middle East ng Abante Middle East Edition.

Dahil sa pagtitiwala ng ilang tao mula ngayon at hangga't andito ang inyong lingkod sa ibang bansa ay hindi ko ipagwawalang bahala at katatamaran ang mag bigay sa inyo ng konting kaalaman kung anu-ano ba ang mga dapat gawin ng bawat Pilipino na sumubok makipagsapalaran sa ibang bayan. Maraming tulong ang nagawa sa kabila ng kakapusan sa pondo subalit hindi pa rin nawawalan ng pag asa para maihatid sa ating mga kababayan ang konting impormasyon na kailangang makarating sa kanila upang kahit paano ay maipabatid sa lahat ang nagagawa ng isang OFW.

Kung mayroon po kayong nais ipabatid sa sulating BuhayOFW ay malugod ko kayong inaanyayahan na sumulat sa angbuhayOFW@gmail.com at aking pong ilalathala sa pamamagitan ng ating sulating BuhayOFW.

Maraming salamat po sa inyong suporta at pagtitiwala hanggang sa muling pagsusulat ng BuhayOFW

Maraming Salamat Vice Ganda, Ruffa Mae, at Jon avila

Doha, Qatar - Ang kasiyahang naganap noong nakaraang biyernes July 15, 2011 ay nasaksihan ng inyong lingkod sa Sheraton Doha. Kasama ang ilang mga kaibigan nakigulo at nakisaya ang BuhayOFW kasama ang mahigit sa 10,000 katao na sabik na sabik na masilayan ang mga artistang sina Vice Ganda, Ruffa Mae Quinto at Jon Avila.

Nagpapasalamat ang napakaraming pinoy na dumalo sa Golden Relations ni CEO Bilal Taha sapagkat walang sawa siyang nagpapadala ng mga sikat na artisita mula pa sa Pilpinas upang pansamantalang alisin ang lungkot bilang BuhayOFW dito sa gitnang silangan Qatar.

Ayon nga sa isang nakausap ko na Pilipina na si Pilar Grace Cruz ng Beat and bytes dancer ang ganitong mga pagtatanghal ay nakakapag alis ng homesick at lungkot sa mga tulad namin OFW. Minsan lang naman at sulit ang aming napanood ika nga niya. Karamihan sa kanila ay hindi mapigilan ang pag halakhak at tawa dahil sa mga kakaibang pagpapatawa at pagpapakilig sa mga taong dumalo sa nasabing palabas.

Sana sa susunod na proyekto ng Golden Relations makasama ulit ang inyong lingkod sa mga ganitong aktibidad na ikinasisiya ng mga BuhayOFW. Kung inyo po sanang mamarapatin ay magkaroon po sana isang bayanihang bahaging halaga na tulong para sa mga kababayan naming may mga problema at kailangan ng konting donasyon. Ang ganitong mga paraan ay siguradong lalopa pong susuportahan at tatangkilin ng maraming Pilipino na sumusuporta sa inyo dito sa Qatar. Umaasa po ang inyong lingkod BuhayOFW na hindi po ninyo ipagkakait ang pagtulong sa kapwa lalo na sa mga Pilipinong BuhayOFW na nasa mabigat na problema.

CCA Group

Kung may nais po kayong ibahaging karanasan sumulat lang po sa angbuhayofw@gmail.com

Maraming salamat po kay Mell Inosanto sa mga kuha larawan